Day: May 20, 2012

DAM CHHUNG HUN HMAN DAN TLANGPUI (Kum 70+)

Kum 23           –           Mutnan

Kum 16           –           Hnathawhnan

Kum 8             –           T.V ennan

Kum 6             –           Einan

Kum 6             –           Zin vei vahnan

Kum 41/2         –           Awm mai mai nan

Kum 4             –           Damloh nan

Kum 2             –           Inchei nan

Kum 11/2         –           Sakhaw lam tan

A Figure nen:-

 

MIZO KRISTIAN HLA HMASA BER

 -Sap Upa & Pu Buanga (KHB No.130)

(A phuahtute ziah dan)

1. Isua vana a om a,

Khawvela zuk lo kal a,

Mihring angin a lo om,

Keima min tidam turin,

Baibal-a ka hmu thei e,

A va tha ber em ve le.

2. Khua, khua a fang e,

Pitar, Putar naopang te,

Mi zong zonga khawngai e,

Thu-in mitdel kebaite,

Mi thi a tidam ta e,

Hetiang a ti fo ve.

3. Isua heta om laia,

Thu tha tak a shoi fo va,

Ka oi chuan Isuan

Keima min tidam ang a,

Oi lo ila Jehovan

Dik takin min hrem ang a.

4. Thu a pek kha Jehovan

Isu’n mi hnen a hril a;

Mi thenin an oi duh e

Thenin oi an duh lo ve,

Oi lo mi an thinur a,

Isua an tihlum ta a.

5. Hetiangin Isu-an

Ka thi aiin a thi ta

Thianten an phum ta a

Ni thum chin nung leh ta

Tuna vana a om e,

Min tidam a duh em e.

He hla hi Mizo Kristian hla hmasa ber a ni a. Sap Upa leh Pu Buanga-te phuah a ni. A thluk erawh chu Sacred Songs and Solos No. 376 ‘Come, Ye Sinners’ tih atanga an lak a ni. An phuah kum hi hriat chiah a ni lo va. Zirtirtu hmasa Vailetan a diary-a a chhinchiah dan chuan a unaupa Lalthawma chu kum 1896 February thla khan Aizawl-ah a kal a; Pu Buanga leh Sap Upa-ten he hla hi Lalthawma chu an lo zirtir tih thu a ziak a ni. Chu vangin 1894 kum tawp lam emaw, 1895 kum emawa an phuah a ni ngeiin a lang a ni.

He hla hi Mizo tawnga Pathian fakna hla hmasa ber a nih avang hian a hluin a ropui danglam bik riau a. Pu Buangate khan hlain thil a tih theihzia leh thu aia mi thinlunga thu a sawi thui theitu a nihzia te an hria a. Chu vangin Pathian fakna hla min lo siamsak a. Mizo tawng zir chawp ve mai siin kum khat lek chhunga heti khawpa hla tha, tun thleng pawha Kristian Hla Bu-a chuantir reng tlak an lo phuah thei hi an fakawm tak meuh meuh a ni.

‘Kristian Hla Bu’ chhuak hmasa ber chu, kum 1889-a Eureka Press, Calcutta-a chhut, hla 18 chuanna, bu te tak te, 41/2” X 31/2”-a hlai, phek 36 leka chhah a ni. Chutah chuan ‘Isua vana a om a’ tih hi No.1-na a ni. Kum 1899-ah hian Khasi leh Zosapte huam vekin Mizoramah ringtu 12 chauh an awm a; Mizo baptisma chang phei chu 3 chauh an la ni; nimahsela, copy 500 lai an chhu a. Pathian ring ngamin a hmangtu tur lam an huphurh lo a ni ang e.

Ti chuan Kristian Hla Bu chu kum 1903 khan Allahabad Mission Press-ah, copy 1000-in chhut a ni ve leh a; chhut 2-naah hian hla 125 zet a chuang tawh a. Kum 4 lek chhungin hla thar 107 zet an neih belh hman a nih chu. Hemi chungchanga thil chhinchhiah tlak deuh mai chu, chhiarpui hmasa ber kum 1901-a Kristian 24 chauh ni, 1903-ah pawh, hnam dangte chhiar tel vek chung pawha Kristian member 161 chauh awm chunga hla bu copy 1000 lai an chhu si hi a ni. Kum 1899-a copy 500 an chhut kha Kristian la ni ve lo tam takin an hmang ve ni ngei tur a ni. Ti chuan hla bu chu kum 1908-ah an chhu leh a, chutah phei chuan hla 273 lai an ngah tawh a ni.

Pu Buangate khan Zoram an chhuahsan dawnin Zosaphluia hnenah hla 7 an hlan a, hengte hi a ni. (an ziah dan angin):-

1. Isua vanah a om a
2. Khawvela kan awm chhung zong
3. Tuna ka oi, ka oi ang e
4. Enge sual tifai thei ang?
5. Thonthu hlui min hril raw
6. Isu, beram vengtu angin
7. Isu, tidamtu khawvel a haw tih te hi an ni.